( لو السهر طال ) الشاعر دخيل الله الازوري

لو السهر طال وتمنيت ماانام

           يكفيني اني في عيونك انا حي

خليني ارسم بالكحل طيف الاحلام 

           واروي هديل الشعر من سحرها شوي

ولا صرت ابقضي باقي الوقت بعتام 

           واحتاج من طول الهدب بارق الضي

ماهمني ولو أزهر براسي اثغام

           وبعض الشجر ماينبت الا تحت في

يامثرية بالحب فكري والالهام 

           قلبي على غيابك شكى لاذع الكي

إخذي من اوقاتي لك سنين وايام

           وسقي عطش قلبي من شفاتك المي

ترى حياتي دونك اشبه بالاوهام 

           والعمر مايسوى بدونك ولا شي

قصيده ( هاضني ياحمد مبداي في المزبان )

الشاعر احمد الازوري

قصيده يخاطب ابنه حمد ويمدح قبيلته وشيخها ضيف الله بن رشدان ويبين فيها مشاركه قبيله عتيبه ومدى اعتماد الشريف عليهم في القتال

هاضني ياحمد مبداي في المزبــــان

في عسيرالحجا في المرقب العالي

يوم جونا العساكرمع طـرف ورقان

والطوابير تمشي من ورى الوالي

قال سيدي علي تكفون يالعتبــــــان

احتموا قطركم رجلي وخيالي

واهني ياحمد من ربعه الــــزوران

الرجال القروم اللي على بالي

يانديبي على مفتوله الذراعـــــــان

حره يوم تسري تقطع اللالي

لين تلفى عقيد القوم بن رشـــــدان

في حلال عليها الضيف مدهالي

الشاعر - عويض الازوري ( قصيده حديث المجالس )

الصمت حكمة والحكي كثْره جنون         

           أمثال تضرب من قديم الزماني

صمتك مقدر بالذهب ثم موزون         

           وأحلى من الفضة بنطق اللساني

ماهو بعيب الصمت ياللي تعيبون         

           العيب للسانك تفك العناني

تخوض في هرج(ن) مع اللي يخوضون         

           ماتفتكر في غثها والسماني

للناس عامل نفسك اليوم فرعون         

           ومن لا يطيعك قلت مجرم وجاني

والدين غنيّته مجارير ولحون         

           تقول ذا كافر وهذاك زاني

وتحلّ مافي يدْك لو كان مليون         

           وتحرّمه للناس في يوم ثاني

والدين دين الله بالله مصيون         

           في كل وقت وكل عصر ومكاني

والكذب مبنية به أبراج وحصون         

           والغيبة امست مثل حفظ الاغاني

في كل مجلس فيه طاعن ومطعون         

           اضحت مجالسنا مجالس غواني

وامّا السياسة بحبها الكل مفتون         

           تقول صايدهم عليها جناني

وان جيت للمضمون مافيه مضمون         

           كل(ن) يكذّب صاحبه في ثواني

أحد(ن) يمجّد فعل صدام بجنون         

           ويقول حبك يالعراقي سباني

وآخر يقول إنه عميل(ن) لصهيون         

           ماشفت فعله في حلبجة كواني

تناقضات اقوال وطعون بطعون         

           واقوال تنقل من فلان لفلاني

واحيان فيها بعضنا يرفع الشون         

           يقول انا صادق وهذا رهاني

والجو كهرب والفضا صار مشحون         

           واحزاب صرنا بعد كنا عواني

لا مشكلة حلّت ولا مات شارون         

           والقدس مارجْعت وحنّا نعاني

ترى السياسة فن من جملة افنون         

           فيها الملوك تقيس كل المعاني

ماهي بجبنة تفطر ابها وزيتون         

           ولا هي مفاطيح بجوف الصواني

ولا هي تجارة داين ابها ومديون         

           ولاّ تماشي من مكان لمكاني

علم السياسة سر محفوظ مكنون         

           عنّأ وعنكم لين يصدر بياني

وليا صدر في كل اذاعة وله لون         

           كل(ن) يحلل كيف ماكان كاني

يامتعب(ن) نفسك تبا تصلح الكون         

           إلحق غنمْك وسوق فوق السواني

خلّ السياسة منته اليوم هارون         

           يكفيك فيها من رعاك ورعاني

واقرا كتاب(ن) كان بالرف مركون         

           واحمد إلآهٍ له بالأحوال شاني

والختم صلينا عدد مال قارون         

           على نبي روضته بالجناني

منـــــاجـــــاة ..! للشاعر فيصل الازوري

ياليت حظ الآدمي فـي دنيتـه حسـب النسـب

والا ياليـت النـذل يتعـب حاجتـه مانالـهـا

قد قيل قبلي : ماعلى دنيا الأمانـي مـن عتـب

والنفس ماأعرف خبثها .. إلا بعـرف وصالهـا

أنا قلـم لامـن تعـب وتوسـد أوراقـه كتـب

والنفس في سطور الورق تكتب وتشـرح فالهـا

أكتب ألم .. ماأكتب غزل .. ولاكتبت بـلا سبـب

أصوات تسمع موجها .. لاأبحرت داخـل جالهـا

أكتب تعب .. والناس تفرح لاكتبت لهـا التعـب

وتدون اسمي تحتها .. وتقـول : فيصـل قالهـا

من قال فاقد شي مايعطيه _ واسمح لي _ كذب

شفني وانا كلي حزن .. والناس واشـرح بالهـا

هاكم شعر .. هاكم تعب .. هاكم خفوق ينتحـب

مافيـه فكـره ماغزاهـا الهـم .. إلا وطالهـا

إليا سكت عاصف هدوء .. وإليا بكى مثل السحب

سحـب مراديـم الخيـال بثقلـهـا تشتالـهـا

وان سال ماسيل سوى دمع العيون اللـي تحـب

وان جفت عيونه عسى الله بـس يرحـم حالهـا

شافت من الدنيا عجايب .. من عذاب ومن كرب

وإيمانها أقوى من غثا الدنيـا وكثـر أهوالهـا

وإليا ذكرت ان البنادم يؤجـر ان كـان احتسـب

حسيـت بالراحـه وغطيـت الرجـل بظلالهـا

وأنكفت رجلي عن مواطن يشتعل فيهـا الحطـب

ومديتها فـي ذل عيـن .. وقلـت : ياحلالهـا

أنت الـذي خلقتنـي وجعلـت لـي داء وطـب

ولقد رات عيني من الرحمـات .. ماقـد هالهـا

وطأت رأسي سائلا ومناجيـا مـن قـد وهـب

وجوارحـي تشكـو إليـك بذلـهـا مابالـهـا

وحمدت نعماك التي أسبغت لـي حمـدا وجـب

حمـدا يليـق بنعمـة أخشـى علـي زوالهـا

حمدا على الدين الذي قد جاد لـي رشـدا ولـب

إنـي لاعجـز بالوفـاء لأنعـم أنــدى لـهـا

يارب عبـدك ماأبتلـي الا وفـي ذنوبـه سبـب

رحمتك في روحه .. دفا الرحمه يارب أشوالهـا

يارب ماني حاسد نفسـي علـى أجـر النصـب

لكن تحدتنـي حمـول فـي الصـدر مدهالهـا

حسيت بضلوعي حطب .. والنار في صدري تشب

لارحم ابو حي الذنوب اللي تعبـت أسعـى لهـا

طعم الخطيه مر في قلـب مـن إناهـا شـرب

والنفس ذكر ذنوبها بعـد الفـراغ أدهـى لهـا

يارب ماكانت ذنوبـي كبـر أو جهـل وشغـب

النفـس أمـارة وأنـا أزريـت أشـد حبالـهـا

وبعد الحديد اللي حمى .. وابليس بيدينه ضـرب

أمسى الهـوى يقتادنـي للمعصيـه وأعمالهـا

لكن وأنا عبد ضميـره لاصحـى فيـه وشجـب

مرغ جبينه فـي التـراب بسجـدة يعنـى لهـا

والإنكسار اللي تشوفه في خضوعـي لـك أدب

خوف ورجاء .. عزم وندم .. بأفعالها واقوالهـا

أسرفت في فعل الخطأ .. والدمع دمع القلب صب

لو كان ماسالت دمـوع العيـن مـن مسيالهـا

هذا أنت ساترني وسترك صار جوف القلب حـب

ولجل الحياء ياذا الكرم .. نفسي نويـت إذلالهـا

نجواك في كل الليالـي ذكرهـا لـي مستحـب

لو كان أنا أقصر كثير أحيـان .. فـي إسبالهـا

يارب عبدك وابن عبدك .. روح ماهو من خشب

دايـم معاليقـه تصيـح الحمـل مـن جمالهـا

أسجد على رمل الثرى يارب لـك حـب وطـرب

وآعيـد لـك سجداتـي اللـي دمعتـي موالهـا

وأخطي وأنا كلي خطأ .. وأحس بي وجه مكـب

وأتوب واذنب بعد توبه .. النفـس هـذا قتالهـا

من قلة إيماني ماهي من كفر ولا مـن عجـب

والنفـس مابيـن أصبعينـك ياعليـم أحوالهـا

وأنسى ذنوبي وأدري ان الذنب مكتوب وحسـب

وأحيان وسط الذاكـره يبقـى بعـض أطلالهـا

بس أنت عفوك ياإلهـي يغفـر ذنوبـي يـارب

رحمتك ماخابـت يديـن اللـي يعيـد سؤالهـا

يارب روحـي خاشعـه دام الحيـاه بهـا تـدب

حفظك لها عن كل سوء استر لها وابقـى لهـا

وان مت أنـا طالبـك ياربـي تجنبهـا التعـب

وأعصم عن النيران صاحبها .. وعـن أغلالهـا

ولوالدينه ضمـن الدعـوه وفـي هـذي طلـب

وانت الكريم اللي جميع النـاس ترحـم حالهـا

الـــشــــاعر /فيصل بن صالح بن علي الازوري

( الفيصلي) .

قصيدة الشاعر ( عويض الازوري) ... عانى من سوق الاسهم

في سوق الأسهم قالوا تجيك صفقات *** تربح وتصبح فوق عرش التجاره


خذ لك مع التجارة صولة وجولات *** يمكن مع المقسوم تبني عماره


شفت العروض وشفت كثر المبيعات *** والمشكل إني من هواة الأثاره


طمرت في سوق المواشي بلحظات *** بشار الشوير اللي بليا مهاره


واخذت لي صفقة على كيف ماجات *** صفقة قوية ذقت فيها الخساره


قمت اترنح مثل شرابة القات *** ولا كما اللي ناطحة قرن ثاره


قالوا تحمل وانت راعي المهمات *** لا تنهزم لو تبغى الصداره


الجولة الأولى ترها بروفات *** وانت صدفة السوق وقت انهياره


قالت المواشي طالقة خمس مرات *** حلفت ما طبيت سوق الجزاره


وشفت الكهارب في بلدنا منيفات *** وانوارها في كل شارع وحاره


فيها عروض المشتري بالالافات *** والناس جاي إلهم عليها اعتكاره


وأخذت في الكهرب خمس لسعات *** فيها تجرعت الألم والمراره


وقلت الزراعي يمكن ابرك بحالات *** لعلي اجني منه حالي ثماره


واشوفها تفتح وتقفل بنسبات *** والربح منها ينهمر وبغزاره


ساعة دخولي صابت السوق نكبات *** حتى المؤشر قال جاكم شراره


قمت اتجول في قطاع الصناعات *** أساس تدعيم الوطن وازدهاره


أكيد مافي هالصناعة خسارات *** مهارة وخبرة ومجلس إداره


وأول بداية طحت في صدق طيحات *** وفي الكيميائية إنكسرت انكساره


وسيسكو وفيبكو كل ابوها مطبات *** وإلا اللجين اللي كواني بناره


والغاز والتصنيع جاني بغازات *** ما عاد اميز ليلها من نهاره


قالوا الاسمنت وقلت مابغي اسمنتات *** الكيس ( 14 ) وقت اشتهاره


ما اريد يا صاحبي سوى الأتصالات *** لعلي احظى بالشرف والأماره


أبراجها ترسل من الجو شارات *** وتقرب اللي مبعدات دياره


خرجت منها فاقد العقل واللذات *** حتى بجوالي فقت الحراره


وأما البنوك ابها قطعت العلاقات *** مالي بها قنصل ولا سفاره


بنك الجزيرة ماذكر فية فودات *** والراجحي مالي علية اقتداره


واسمع علوم الناس فيها مريبات *** كلن على كيفه يصدر قراره


تركتها ومالي مال المتهات *** هي بالحلال وما كسبنا غراره


رحت اتشكوى عند قوم الملامات *** قالوا تشطر والتجارة شطاره


السوق مثل البحر ظلمة ولجات *** والحوت ليمن جاع ياكل صغاره


كنت احسب إن المشكلة في القطاعات *** وأثر المشاكل من سباع المغاره


اللي لهم في السوق فن ومهارة *** والسهم لامن زاد وطو عياره


يمارسون القرصنة والغوايات *** ويمثلون اسم الشرف والطهاره


واحنا غدينا للهوامير صيدات *** نبي الهروب وشددوا بالخفاره


لامن شرينا صار بالسوق نكبات *** وليا نوينا البيع زاد انحداره


راح الحصيل وراحت اعلومنا أفوات *** واللي سلم منا طريح الجباره


حصدت من سوق التداول ريالات *** ابها اختم المشهد واصك الستاره

محاوه بين الملك فيصل واحمد الازوري ولويحان ( رحمهم الله جميعا )

محاوره جمعت كل من الملك فيصل واحمد الازوري ولويحان رحمهم الله جميعا وهذا يدل على مكانه الشاعر احمد الازوري عند الملك فيصل وقد كان الملك فيصل يحب مداعبته بالشعر ويظهر في هذه المحاوره التي لاتعبر الا عن حبهما لبعض على الرغم من معرفه الشاعر لامجاد الملك فيصل وبطولاته في قياده الجيوش وترسيه قواعد واركان الحكم والدوله

الملك فيصل

يااحمد اسمع كلام ابن الســــــــــــعود

ابن عبدالــــــــــــعزيز الفيصــــلي

يوم جينا مع الديره سنـــــــــــــــــــود

كل حــــــــــــــاجز يغيض ويمتلي

احمد الازوري

مرحبا يافهد جابك فهــــــــــــــــــود

جابـــــــــــــــــك الله وحضك معتلي

يوم جيتوا والا الديره مــــــــــــهود

عبــــــــــدلي طردله عـــــــــــــبدلي

لويحان

يوم جينا كما نو يقــــــــــــــــــود

والمنــــــــــــازل نخليـــــــــــها خلي

ياوجودي علاكم بالوجـــــــــــود

كل قبــــــــــــــرتحطـــــــــــونه ولي

احمد الازوري

يالله انته من ايات الـــــــــــبدون

من اهل الشــــــــــــــعب والا جرولي

الملك فيصل

الجواهر تجيك من العـــــــــقود

افتلـــــــــي في الجواب افتــــــــــــــلي

احمد الازوري

ليت عندي حمد والا حـــــــمود

يوم راحــــــــــت المحـــــــــــات الدلي 

حط نفسك محلّي - للشاعر ( صالح الازوري )

(قصيدة حط نفسك محلّي)

من علمك تعصى بعد كنت مطواع

         

          ومن علمك حتى فنون التغلي

ما ودي أخسف بك واوديك للقاع 

        

          ترى قلوب الناس ماهي تسلي

إن كان تبغى بالشريعه والإجماع 

        

          هذا خطا منكم ودوبه حصل لي

وان كان تبغاها سواليف ملتاع

        

          وين انت عنّي غبت يا طير يا اللي

ارحم ترى راع المحبين جزّاع 

        

          ما دمت يا الغالي تصوم وتصلي

قلبي شكى يا زين من كثر الأوجاع 

        

          انا طلبتك حط نفسك محلي

راع الهوى طاريه بين العرب ذاع 

        

          احد يرد القول واحدٍ يهلي

واحد يقول انا نصحته ولا طاع 

        

          واحد يقول ارتاح خله يولي

ما عاد نقبل منكم انصاص وارباع 

        

          لازم تجي كلك وانا جيك كلي

ومن راح من ساعه تركناه من ساع 

        

          لو كان صاحب صحبته ما تملي