بدينا باسم خلاق الخلايق محيي الأموآت
إلآه الكون كل الكون في حكمه وتدبيره
رحيم الخلْق في يوم التنادي غافر الزلاّت
بديع الصنع جلّ الخالق بصنعه وتصويره
واثنّي بالسلام ورحمة الله وانثر الباقات
على جمْع الحضور اللي لفا وارست بوابيره
احيّيكم من الاعماق بتحيات مثنيات
يعطرها البختْري والنفل بالفين تعطيره
وسبحان الإله مْغيّر الأحوال والحالات
أحد يرقا على السلّم والآخر يطلب الخيره
تدور الارض تحت الشمس باقصى كامل الدورات
وفوق الارض شمسٍ دايره مليون تدويره
كذا الانسان إله فالمعترك صوله وله جولات
ولا انهى جولته فالمعركة غاب وحضر غيره
ولكن مايغيب الفارس اللي قد ترك بصمات
على لبّ اللبيب مسطرة باحلا طباشيره
إلى من غاب صوته مايغيب الصيت لو لحظات
تذكرنا محاسين الخلوق وحسن تعبيره
ولو نبكي على فرقا الزميل وننثر العبرات
من الاصحاب والاجناب نلقا به معاذيره
فداك من العدا ياشيخنا عوالي الهامات
فداك الروس والألمان والمحتل للديره
تمسكت بكتاب الله وزادك فالملا رفعات
حفظك الله ياحافظ كتاب الله وتفسيره
وفي جمعية التحفيظ لك وقفة ولك مدّات
سهومك مع سهوم المحسنين تعطر السيره
إمام وعمّك اللي بالآذان يجاذب الصدحات
ولك في كل وقتٍ صوت تهليله وتكبيره
تعودنا على الوجه الصبوح نشاهد البسمات
عليه النور من نور الإله وزاد تنويره
ومخْلص فالعمل إخلاص ينبع من صميم الذات
ما هو من قام للحصّة يدور وين تحضيره
ولك فالتوعية لأهل القلوب الواعيات اثبات
براعيمٍ على حب الوطن تركب مخاطيره
ماهو باللي لياجنّ الظلام يوزع النشرات
وإلى بان النهار انهارت اعصابه من الحيره
ابو عثمان إله في كل وقت فات مطويات
تحذرنا من اسباب الفتن ويزيد تحذيره
وفي الاصلاح بين الناس إله ممشى وله خطوات
ولا قد سجلت له في دروب الخير تاخيره
ولد عمّي وعْرفه وان مدحته م احتري شرهات
اقوم بواجب الاسلام والمعروف والجيره
عريب الجد ماله قد فالمدات والضدات
وله فالمرجله والكيف تذخيره وتبهيره
عسى الله يحفظك ياشيخنا ياطيب الوقفات
ويجعل مابذلته في سبيل العلم تطهيره
وعسى لك في علالي جنة الفردوس حوريات
وعلى النهر المصفّى لك مواريدٍ وتصديره
نودع شيخنا ونكرمه في اطيب الحفلات
على العادة يكرّم كل من تثمر مثاميره
واغنّي له من عذوب الشعر بالحان شعبيات
عسى في ليلة التوديع نوفي بعض تقديره
اقول الشعر بعد الله وهبني فيه ترنيمات
ولا قد قلت قول وقيل لي فالقول تزويره
انا من طيبين الراس والمغراس والقالات
ولد شيخٍ لذبح الحيل ما تفتر سواطيره
انا ولْد القطامي لا ارتقا تتْبعه بالنظرات
عيون اللي عشق وقت الهداد ويعشقه طيره
انا الرمح الاصيل السمْهري واسدد الطعنات
بصدر اهل الحسد والحقد والتشويش والغيره
ولا ياحالمٍ بمعانق نجوم السما هيهات
ولو زوادتك فيها جواز وفيه تاشيره
وصلاة الله عدد ما تكتب الاقلام بالصفحات
على اللي دعوته للدين تبشيره وتنذيره
